Во стрип-албумот ,,КАНТАНА” епизода ,,ЗА ОДМАЗДА ПОВЕЌЕ”, авторот Јовчевски ве носи во оние познати постулати на класичниот вестерн: широка прерија по која јава осамен јавач, поштенски кочии, возови со парни локомотиви, ловец на уценети глави, бескрупулозни бандити, измамени и убиени индијанци, индијански одмазници, каубојци истерувачи на своја правда, салун со пијаници и дами за забава... Стожер на приказната е ликот на Бил Балука од Индијанците наречен Кантана (гробар). На почетокот на приказната тој е младо момче чиј татко е убиен, речиси пред неговите очи, а десеттина години подоцна тој се преобразува во одмазник на виновниците за неговата лична несреќа, но и на заштитник на Индијанците и на другите жртви на насилниците од секаков род и вид, присутни во тоа време и на тој простор.
„Палавковците Влатко и Емче“ е илустрирана книга за сите непораснати и пораснати деца, која плени со ведрината на својата содржина. Низ куси умно-хумористични епизоди го следиме растењето не само на Влатко и Емче, туку и на нивните најблиски. Една од важните работи во развојот на секое дете, а која често сe заборава, е токму хуморот.
Стапче и Шишка е стрип интеграл од одбрани неделни епизоди кои биле објавувани подолг временки период во електронска форма на веб сајт, овде за прв пат испечатени во хартиена форма.
„ЦРНАТА АУРОРА“ ја содржи целосната хорор епопеја за темниот облак од ѕвездена прашина што мистериозно се појавува над Скопје. Никој нема објаснение за овој феномен („НЛО? Порта кон пеколот? Многу чуден кумулонимбус?“), освен Ален Корбин кој стравува дека Црната аурора е директно поврзана со неговите кошмари. „ЦРНАТА АУРОРА“ е прва графичка новела на тандемот Дукоски – Благојевиќ.
РАЗЛИЧНИ СВЕТОВИ е стрип антологија составена од повеќе кратки стрипови во колор, од стрип авторот Никола Темков, работени во различни периоди од творештвото на авторот, кои обработуваат доста различни мотиви. Од Александар Македонски, Крале Марко, Крстоносните војни, од магичните светови на Толкин, до суровата реалност на денешницата, од приказните се редат една после друга, без некој хронолошки редослед, но со една заедничка црта: во секоја од нив постојат два различни света кои во еден момент се среќаваат и меѓу нив доаѓа до конфликт. Решението за конфликтот е во секоја стрип приказна различно решен, но одговара на многу прашања, од кои најважното е она кое можеби и ние самите секојдневно си го поставуваме: дали да се спротивставиме, или да се приближиме со другата спротивставена страна?
Wanted - Вестерн Колекција на Јовчевски е збирка на класични вестерн стрип-минијатури сместени во историската мизансцена од втората половина од XIX век во специфичното и препознатливо опкружување на далечните и сурови предели на американскиот запад.